Azken urteetan asko hitz egin da hodei konputazioari eta gure datuen pribatutasunari buruz. Horri lotuta, hainbat famaturi euren iCloud kontutik argazki pribatuak lapurtu eta zabaldu ostean, bolo-bolo dabil, ‘CelebGate’ delakoa. Zure datuak behar bezala gordetzeko, jarraitu ondoko argibideak.
Sareko informazioaren segurtasun faltari irtenbidea bilatzeko asmoz, Apple, Google, Microsoft, Dropbox eta, orohar, hodei konputazioan oinarritutako zerbitzuak eskaintzen dituzten enpresak lan handia egiten ari dira datuen segurtasuna bermatzeko ahaleginean. Horrek, baina, ez du esan nahi datuak filtratu ezin direnik.
Dena den, enpresa horien esfortzuak ez du ezertarako balio erabiltzaileok sarean nabigatzeko eta gure datuen segurtasuna bermatzeko egin behar duguna egiten ez badugu. Garrantzitsua eta erraza da, hasteko, gure sistema eragilea eta nabigatzailea –Google Chrome, Internet Explorer zein Firefox– eguneratuta izatea. Normalean, ordenagailuak ematen du eguneraketen berri, eta soilik instalazioa baieztatu behar du erabiltzaileak.
Bestalde, pasahitza ondo aukeratzea ere garrantzitsua da. Normalean, jendeak ez du pasahitz segurua aukeratzeko denbora gehiegirik hartzen, eta ondorioz, kontuak erasotzea erraza izaten da. Pasahitzek gutxienez zortzi karaktere izan behar dituzte eta letra xeheak, larriak, karaktere bereziak eta zenbakiak nahasi behar dira, modu horretan, 30.000 konbinazio posible izango baititu erasotzaileak.
Azkenaldian, gainera, Google, Dropbox eta Apple bezalako enpresek bi pausotan egin beharreko egiaztapen sistema jarri dute martxan, pasahitza eta telefono mugikorra uztartzen dituena. Funtzionamendua oso erraza da; Google kontua adibide hartuta azaldu daiteke. Lehendabizi, erabiltzailearen telefono zenbakia zehaztu behar dugu, eta ostean, Google kontuan saioa hasterakoan kode bat bidaliko digute gure mugikorrera. Horrela, ordenagailu berri batetik kontura sartu nahi dugun bakoitzean, mugikorra eskura izatea beharrezkoa izango da.
Zerbitzu berriak
Gaur egun soinean daramatzagun gailuetan, tablet zein Smartphone-tan, informazio oso garrantzitsua eramaten dugu, eta horregatik garrantzitsua da horiek ere patroi edo PIN bitartez blokeatzea. Zerbitzu hori hobetzeko hainbat aplikazio sortzeko lanean ari dira enpresak. Esate baterako, Dropbox aplikazioaren azken eguneraketetan edukia PIN baten bitartez babesteko aukera dago, eta mugikorra galduz gero, aurkitzen duenak lan gehiago egin beharko du erabiltzailearen informazioa eskuratzeko.
Gainera, dagoeneko posible da Android eta iOS sistema eragilea duten gailuak beti lokalizatuta izatea. Androiden kasuan, www.android.com/devicemanage webgunearen bitartez, norberaren gailua non dagoen ikusi daiteke, eta baitaSmartphone-a blokeatu edo bost minutuz soinua egiten jarri ere.
Beraz, geure datuen segurtasuna mantetzeko gutxieneko esfortzu bat egin dezakegu, ahaztu gabe, daturik seguruenak gure buruan ditugunak direla.
iruzkinik ez:
Argitaratu iruzkina